झुबैर अटक प्रकरणः तक्रारदाराचे ट्विटर अकाउंट गायब

नवी दिल्लीः फेक न्यूजचा पर्दाफाश करणाऱ्या अल्ट न्यूजचे सहसंस्थापक मोहम्मद झुबैर यांना ज्या ट्विटर अकाउंटवरच्या तक्रारीवरून अटक करण्यात आली होती ते @balajikijaiin हे ट्विटर अकाउंट अस्तित्वात नसल्याचे दिसून आले आहे.

झुबैर यांच्या विरोधात दाखल केलेल्या पोलिस फिर्यादीत ‘हनुमान भक्त @balajikijaiin या ट्विटर अकाउंटने मोहम्मद झुबैर (@zoo_bear) याने केलेले ट्विट शेअर केले होते. झुबैर याच्या मूळ ट्विटमध्ये एका हॉटेलचा बोर्डाचा फोटो होता. या हॉटेलचे नाव हनीमून हॉटेल असे बदलून हनुमान हॉटेल असे बदललेले दाखवण्यात आले होते व हे १९८३ रोजी प्रसिद्ध झालेल्या हृषिकेश मुखर्जी दिग्दर्शित किसीसे ना कहना या चित्रपटातील दृश्याचा स्क्रीनशॉट होता. या ट्विटमध्ये ‘२०१४ पूर्वी हनीमून ह़ॉटेल… २०१४ नंतर हनुमान हॉटेल’ असे लिहिले होते.  

@balajikijaiin या ट्विट अकाउंटने झुबैरचे ट्विट धार्मिक तेढ निर्माण करत असल्याचा आरोप केला होता. हनुमान भगवान हे ब्रह्मचारी असून त्यांचा संबंध हनीमूनला जोडला जात आहे हा हिंदूंचा अपमान असून झुबैर याच्याविरोधात कारवाई करावी अशी तक्रार या ट्विटमध्ये करण्यात आली होती.

@balajikijaiin या ट्विट अकाउंटने झुबैरचे ट्विट धार्मिक तेढ निर्माण करत असल्याचा आरोप केला होता. हनुमान भगवान हे ब्रह्मचारी असून त्यांचा संबंध हनीमूनला जोडला जात आहे हा हिंदूंचा अपमान असून झुबैर याच्याविरोधात कारवाई करावी अशी तक्रार या ट्विटमध्ये करण्यात आली होती.

या तक्रारीनंतर झुबैर यांना अटक करण्यात आली होती. बुधवारी दिल्ली पोलिसांनी इंडियन एक्स्प्रेसला सांगितले की झुबैर यांच्याविरोधात तक्रार करणारा/ट्विटर यूजरशी संपर्क होऊ शकला नाही.

झुबैर याच्या अटकेनंतर या ट्विटरवर अकाउंटद्वारे एकच ट्विट करण्यात आले व त्याचा एकच फॉलोअर दिसून आला. त्यानंतर १२०० फॉलोअर झाले व बुधवारी हे अकाउंट उडवलेले दिसून आले. हे अकाउंट उडवलेले दिसत असले तरी याचा तपासावर परिणाम होणार नाही असे पोलिसांचे म्हणणे आहे.

दरम्यान मंगळवारी झुबैर यांच्या वकील वृंदा ग्रोवर यांनी न्यायालयाला सांगितले की, एक अज्ञात अकाउंट धर्म पालन करणाऱ्यांचा अधिकृत प्रवक्ता मानला जाऊ शकत नाही. जर एखाद्या अज्ञात अकाउंटने देशात काही गदारोळ माजवला असेल तर त्या अकाउंटची चौकशी केली जावी. यावर सरकारी वकीलांनी हे अकाउंट केवळ माहिती देणारे होते ते तक्रारदार नाही असा युक्तीवाद केला.

गुरुवारी दिल्ली पोलिसांच्या एका पथकाने बंगळुरूस्थित झुबैरच्या घरात जाऊन तपासणी केली व काही वस्तू ताब्यात घेतल्या. झुबैरने दिल्ली उच्च न्यायालयात जामीन याचिकाही दाखल केली आहे.

प्रकरण नेमके काय आहे?

झुबैर यांना ‘हनीमून-टू-हनुमान हॉटेल’ ट्विट फोटोप्रकरणात दिल्ली पोलिसांनी अटक केली त्या ट्विटमधील फोटो १९८३मध्ये प्रसिद्ध झालेल्या ‘किसीसे ना कहना’ या प्रसिद्ध दिग्दर्शक हृषिकेश मुखर्जी यांच्या हिंदी चित्रपटातला आहे. झुबैर यांना सोमवारी धार्मिक तेढ व दंगल भडकवण्याच्या आरोपावरून दिल्ली पोलिसांनी अटक केली होती. झुबैर यांनी हे ट्विट २४ मार्च २०१८ सालमध्ये केले होते. हे ट्विट म्हणजे हॉटेल बोर्डाचे फोटो होता व ते गेले चार वर्षे अजूनही त्यांच्या ट्विटर अकाउंटवर कायम होते.

झुबैर यांच्या या ट्विटविरोधात तक्रार एका ट्विटर हँडलवरून करण्यात आली होती, ते अकाउंट ऑक्टोबर २०२१मध्ये उघडण्यात आले होते. या अकाउंटमधून एकदाच १९ जूनला ट्विट करण्यात आले होते, त्या ट्विटमध्ये झुबैरला लक्ष्य करण्यात आले होते.

दिल्ली पोलिसांनी ज्या फोटोवरून झुबैर यांना अटक केली तो फोटो २०१८मध्ये इंडियन एक्स्प्रेसच्या एका लेखातही प्रसिद्ध झाला होता. त्यावर कोणाचे लक्षही गेले नव्हते व अशा फोटोने धार्मिक तेढ निर्माण झाली अशी तक्रारही कोणी केली नव्हती.

महत्त्वाची बाब अशी की किसीसे ना कहना चित्रपटातील या हॉटेलच्या बोर्डावर सेन्सार बोर्डने हरकत घेतली नव्हती. हा चित्रपट आजपर्यंत अनेक वेळा दूरदर्शन व अन्य वाहिन्यांवर दाखवण्यात आला आहे.

झुबैर यांना जाणूनबुजून लक्ष्य?

प्रेषित पैगंबर यांच्यावर अवमानास्पद टीका केल्यामुळे निलंबित व्हाव्या लागलेल्या भाजपच्या प्रवक्त्या नुपूर शर्मा यांनी झुबैर यांना लक्ष्य करण्यास सुरूवात केली. झुबैर यांच्या अनेक ट्विटमुळे आपल्याला जिवे मारण्याच्या धमक्या मिळत असल्याचा आरोप त्यांनी केला होता. या आरोपानंतर #ArrestMohammedZubair या हॅशटॅगखाली राष्ट्रीय स्तरावर ट्विटर ट्रेंड चालू करण्यात आला आणि उ. प्रदेशातून एक फिर्याद दाखल करण्यात आली. झुबैर यांनी आपल्या ट्विटमधून धार्मिक तेढ निर्माण केली असा आरोप करण्यात आला.

झुबैर आपल्या ट्विटर हँडलवरून अनेक उपहासात्मक ट्विट, फोटो प्रसिद्ध करत असतात, त्यांचे बहुतांश ट्विट सत्ताधारी भाजप व कडव्या हिंदुत्ववादी गट यांच्याविरोधात असल्याने ते हिंदुत्ववादी गटांचे विशेष करून लक्ष्य झाले आहेत.

मूळ बातमी