‘नोमडलँड’ला ऑस्कर

९३ व्या अॅकॅडमी पुरस्कार (ऑस्कर) सोहळ्यात ‘नोमडलँड’ला उत्कृष्ट चित्रपटाचा पुरस्कार मिळाला. या चित्रपटासाठी अभिनेत्री फ्रान्सेस मॅकडॉर्मंट हिला सर्वोत्कृष्ट अभिनेत्रीचा ऑस्कर पुरस्कार मिळाला, तर क्लोई चाव यांना सर्वोत्कृष्ट दिग्दर्शनासाठी पुरस्कार मिळाला.

क्लोई चाव

अँथनी हॉपकिन्स

फ्रान्सेस मॅकडॉर्मंट

भारतीय प्रमाणवेळेनुसार आज पहाटे झालेल्या २०२१ सालच्या ऑस्कर पुरस्कार सोहोळयात ‘नोमडलँड’ चित्रपटाला तीन पुरस्कार मिळाले. ऑस्करच्या इतिहासात दिग्दर्शनासाठी पुरस्कार मिळालेल्या त्या दुसऱ्या महिला दिग्दर्शक ठरल्या आहेत. या आधी बाफ्टा पुरस्कार सोहळ्यातही ‘नोमडलँड’ला सर्वोत्कृष्ट चित्रपटाचा पुरस्कार मिळाला आहे. गोल्डन ग्लोब, डिजीए या पुरस्कारांमध्ये या चित्रपटाला विविध पुरस्कार मिळाले आहेत.

कोरोना संसर्गाच्या पार्श्वभूमीवर युनियन स्टेशन आणि डॉल्बी थिएटर येथे झालेला हा ऑस्कर पुरस्कार सोहळा ऑनलाईन पद्धतीने दाखविण्यात आला. या सोहळ्यात ‘द प्रॉमिसिंग यंग वुमन’,  ‘द फादर’, ‘नोमेडलँड’,

‘साऊंड ऑफ मेटल’ ‘जुडास अ‍ॅण्ड द ब्लॅक मसीहा’ या सिनेमांना पुरस्कार मिळाले.

अभिनेते अँथनी हॉपकिन्स यांना ‘द फादर’ या चित्रपटासाठी सर्वोत्कृष्ट अभिनेत्याचा पुरस्कार मिळाला. तर अभिनेत्री योहून यु जंग यांना ‘मिनारी’ या चित्रपटासाठी सहाय्यक अभिनेत्रीचा पुरस्कार मिळाला. अभिनेता डॅनियेल कालूया यांना सर्वोत्कृष्ट सहाय्यक अभिनेत्याचा पुरस्कार मिळाला.