भोंगे वाजले की हनुमान चालिसा म्हणाः राज ठाकरेंचे आदेश

मुंबईः मशिदींवर भोंगे वाजले तर त्या संदर्भात पोलिसांकडे १०० क्रमाकांवर तक्रार करा, मशिदींपुढे हनुमान चालिसा दुप्पट आवाजात म्हणा, असे आदेश मनसे अध्यक्ष राज ठाकरे यांनी आपल्या पक्ष कार्यकर्त्यांना मंगळवारी उशीरा संध्याकाळी दिले. या आदेशामुळे राज्यातील कायदा व सुव्यवस्थेचा प्रश्न निर्माण झाला आहे. राज ठाकरे यांनी भोंग्याना प्रत्युत्तर देण्यासंदर्भात तीन पानाचे एक पत्र सोशल मीडियात प्रसिद्ध केले. या पत्रातील संपूर्ण मजकूर खालील प्रमाणेः

उद्या ४ मे.
मशिदींवरचे भोंगे ४ मेपर्यंत उतरवा, असे आम्ही सरकारला आधीच सांगितलं होतं. परंतु याबाबत सरकारची भूमिका बोटचेपेपणाची आहे. या देशातल्या राज्य सरकारांतला प्रत्येकजण सर्वोच्च न्यायालयाचे दाखले देतोय. धर्माच्या नावाखाली वयोवृद्ध, रुग्ण, अशक्त व्यक्ती, लहान मुले, विद्यार्थी यांना भोंग्यांच्या आवाजामुळे होणाऱ्या त्रासाबाबत सर्वोच्च न्यायालयाचा जो निर्णय आहे, त्या निर्णयात सर्वोच्च न्यायालयाने स्पष्ट सांगितलेलं आहे की “रात्री १० ते सकाळी ६ वाजेपर्यंत कुणालाही ध्वनिक्षेपक वापरता येणार नाही. प्रत्येक धर्मियांच्या सणांना तेवढ्याच दिवसांपुरती ध्वनिक्षेपक लावण्याची परवानगी मिळेल, परंतु ३६५ दिवस परवानगी मिळणार नाही. ध्वनिक्षेपकासाठीची परवानगी ही रोज घ्यावी लागेल.”

कायदा सुव्यवस्था राखण्याची जबाबदारी असलेल्या सर्व पोलीस अधिकाऱ्यांना माझी हात जोडून विनंती आहे की, या देशात, या राज्यात ‘कायद्याचं राज्य’ आहे हे त्यांनी दाखवून द्यावं. त्यांनी अनधिकृत मशिदी, अनधिकृत भोंगे, रस्त्यांवर होणारे नमाज पठण यांना जबाबदार असलेल्या लोकांना आपला पोलिसी खाक्या दाखवावा.

हिंदूंच्या सणांना सायलन्स झोन, शाळा, रुग्णालय अशा सर्व प्रकारच्या अटीशर्तीच्या नावाखाली मर्यादा घालायच्या, परंतु मशिदींना कोणत्याही प्रकारच्या अटी घालायच्या नाहीत! भारतीय संविधानाने सांगितलेल्या धर्मनिरपेक्षतेच्या कोणत्या व्याख्येत हे बसते? म्हणूनच हिंदूंनो,

सामाजिक भान बाळगत ज्या मशिदींवरील भोंगे उतरवण्याचा निर्णय घेण्यात आला आहे, त्या मशिदींशी संबंधित लोकांच्या स्तुत्य निर्णयाचे मी स्वागत करतो. तसंच, जिथे भोंगे उतरवण्यात आले आहेत, त्या मशिदींच्या परिसरात कोणताही त्रास होणार नाही, याची हिंदू बांधवांनीही काळजी घ्यावी.

मला पूर्ण कल्पना आहे की, आपल्या देशात असे अनेक मुस्लिम नागरिक आहेत ज्यांना भोंग्यांचा त्रास होतो. पण कर्मठ धर्मगुरूंपुढे, कट्टर धर्मवाद्यांपुढे त्यांना बोलत येत नाही. ते असो. देशातल्या माझ्या तमाम हिंदू बांधवांनी भोंग्यांविरोधात काम सुरू करावे. हा विषय एका दिवसात सुटणारा नाही, याचीही मानसिक तयारी ठेवावी. देशातल्या सर्व राज्यकर्त्यांना हे भोंगे बंद पाडण्यास भाग पाडावे. आणि शेवटी एकच सांगतो, प्रत्येक राज्यातल्या नागरिकांनी आपापल्या सत्ताधारी राज्यकर्त्यांना हिंदूंची ताकद काय आहे; हे दाखवून द्यावे.

देशात इतकी कारागृहं नाहीत की देशातल्या तमाम हिंदूंना कारागृहात डांबणे सरकारला शक्य होईल! हेसुद्धा सर्व सरकारांनी लक्षात घ्यावे. माझ्या हिंदू बांधवांनो, भगिनींनो आणि मातांनो, भोंगे हटवण्यासाठी सर्व राजकीय पक्षांची बंधनं झुगारून एकत्र या.

आता नाही, तर कधीच नाही

आपला नम्र

राज ठाकरे

राज ठाकरेंवर गुन्हे दाखल

दरम्यान, औरंगाबाद सभेत पोलिसांनी घातलेल्या १६ अटींपैकी काही अटींचे उल्लंघन झाल्या प्रकरणी मंगळवारी पोलिसांनी मनसेचे अध्यक्ष राज ठाकरे यांच्याविरोधात कलम ११६, कलम ११७ व कलम १५३ अंतर्गत गुन्हे दाखल केले आहेत.

औरंगाबाद पोलिसांनी घातलेल्या अटींमध्ये सभेसाठी उपस्थित राहणाऱ्यांची संख्या, लाउड स्पीकरचा आवाज, आक्षेपार्ह वक्तव्य न करणे, चिथावणीखोर विधाने न देणे अशा स्वरुपाच्या अटी होत्या. त्या अटींचे राज ठाकरे यांनी उल्लंघन केल्याचे पोलिसांचे म्हणणे आहे. पोलिसांनी सभेचे आयोजक असलेले राजीव जेवळीकर यांच्यावरही गुन्हा दाखल केला आहे.