राज्यात एकाच दिवशी ५ लाख लोकांना लस

राज्यात एकाच दिवशी ५ लाख लोकांना लस

मुंबई: कोरोना प्रतिबंधात्मक लसीकरणात महाराष्ट्राने सोमवारी विक्रमी नोंद करत सायंकाळी सहापर्यंत ५ लाखांहून अधिक नागरिकांना लस दिली. ३ एप्रिलला ४ लाख ६२ हजार ७३५ नागरिकांचे लसीकरण करून राज्याने राष्ट्रीय विक्रम नोंदविला होता. सोमवारी राज्याने लसीकरणात पाच लाखांचा टप्पा ओलांडल्याबद्दल मुख्यमंत्री उद्धव ठाकरे, आरोग्यमंत्री राजेश टोपे यांनी यंत्रणेचे अभिनंदन केले आहे.

लसीकरणात महाराष्ट्र देशात सातत्याने अग्रस्थानी आहे. आतापर्यंत १ कोटी ४३ लाख ४२ हजार ७१६ नागरिकांचे लसीकरण झाले असून त्यात सोमवारची संख्या मिळवली तर सुमारे १ कोटी ४८ लाखांच्या आसपास ही संख्या होत असून मंगळवारच्या लसीकरणानंतर महाराष्ट्र दीड कोटी नागरिकांच्या लसीकरणाचा टप्पा ओलांडेल, असे आरोग्य विभागाचे प्रधान सचिव डॉ. प्रदीप व्यास यांनी सांगितले.

गुजरात, राजस्थान, उत्तरप्रदेश या राज्यांच्या कैकपटीने महाराष्ट्र पुढे असून २६ एप्रिल रोजी राज्यात आतापर्यंतचे सर्वाधिक ६,१५५ लसीकरण केंद्र होते. त्यामध्ये ५,३४७ शासकीय आणि ८०८ खासगी केंद्रांचा समावेश आहे.

कोरोना प्रतिबंधात्मक  लसीकरणात राज्य पहिल्यापासूनच अग्रसेर राहिले आहे. कोरोनाच्या वाढत्या पार्श्वभूमीवर राज्यात लसीकरणाला वेग देण्यासाठी सध्या होत असलेल्या लसीकरणाच्या दुप्पट संख्येने लसीकरण करण्याचे उद्दीष्ट ठेवण्यात आले आहे. अशाच पद्धतीने लसीकरणाला वेग दिल्यास लवकरच राज्यात दिवसाला ८ लाखांहून अधिक नागरिकांना लस देण्याचे उद्दिष्ट गाठता येईल, असे आरोग्यमंत्री टोपे यांनी सांगितले.

राज्यात १ एप्रिलपासून ४५ वर्षांवरील नागरिकांना लसीकरणाला सुरूवात झाल्याच्या पहिल्याच दिवशी ३ लाखांहून अधिक जणांना लस देऊन राज्याने उच्चांक गाठला होता.

COMMENTS